陳豪自揭黑歷史還原「同朕 Check 吓」
今晚（20 日）播出一集，有陳豪率領的「破毒強人」隊，成員包括胡定欣、蕭正楠、何廣沛和郭柏妍，對戰方麗盈率領的「天涯歌女」隊，成員包括何儷沂、歐寶娜、韋飛雄和陳家美。
《破毒強人》熱播當中，視帝陳豪（阿 Mo）甫出場即以招牌「文華」聲和大家打招呼，思捷問到為何聲音會這樣？鬼馬的陳豪笑言：「因為食咗啲好嘢，飲咗啲靚咖啡之後，把聲就變咗 High High 地!」在劇中與陳豪有無限恩怨情仇的蕭正楠接著說：「我同阿 Mo 條線好好睇。」顧住硬銷自己「忽視」了隊友，旋即引來定欣和廣沛怒睥圍攻，知衰的阿蕭即補鑊耍冧：「條條線都咁好睇!」劇中飾演啞巴的廣沛更應思捷要求示範手語。
至於「天涯歌女」隊全是唱得之人，穿上Bling Bling 歌衫的她們即席獻唱《天涯歌女》，氣氛十足。方麗盈是 80 年代末出道歌手，其 1988 年推出的《傷感雨天》Hit 爆 K 場，後來輾轉做過保險業和地產界，近年更有擔任特約演員，曾客串演出《愛.回家之開心速遞》、《七公主》、《金宵大廈 2》等不同劇集，相信不少觀眾會覺得她熟口熟面。昨晚，無綫官網更上載了方麗盈即場獻唱《傷感雨天》的精華片段預熱，連結：https://youtu.be/T03-E3ksykA
今集問答環節笑料十足，其中一條問題是「講到陳豪會諗起啲乜？」，玩得之人阿 Mo 自揭黑歷史，重新演繹當年在《帝女花》的經典對白「同朕 Check 吓」，惹來全場爆笑。另一條問題「年紀超過 40 歲，又靚又 Nice 又叻又有錢嘅淑女，點解會單身？」，身為單身貴族的定欣即被思捷瘋狂狙擊，有人回答「太花心」時，思捷即追問定欣：「係咪呀？」不過見慣大場面的定欣未有被拋窒，只是淡定說：「點解望住我呀？唔知喎!我個人好專一。」至於每次答問題都危危乎的郭柏妍，竟擔起「清版」重要責任，到底她最終是陀衰家還是一個救全家？密切留意今晚播出的《思家大戰》。